睇書人睇誠品

一、

對不起,睇到今天,關於誠品的評論,都非常之悶。因為所寫嘅都不外乎三種。

第一、香港人最關心:咁貴租,玩唔耐啦;
第二、比較犬儒:呢個文化沙漠,又係要靠外國品牌帶起讀書文化(不過都係無望架啦,香港人都只不過都係鐘意睇埋啲低品味嘅嘢);
第三,咪又係啲文化霸權食埋啲小商店!

而這三種都有一個同樣可笑嘅寫法:一邊嘲笑香港人唔識字,可是另一邊,如何欣賞書店的事一句也不提,誠品的好,似乎也旨在其「文化氛圍」,二十四小時營業呀,裝修如何有心思呀。不看清楚,你以為在看港女食評!

大佬呀,書店嚟架,人地寫fashion都講下boutique呢季流行咩色咩款。咁多篇,除左林忌一篇, 其餘的都沒有提及過裏面的書種。大部份評論都將大眾、PageOne、商務、三聯、中華都放在同一個叫「大型外資書店」的Label下。死咩!

行一次入 去,你都會發覺佢地賣嘅書種喺唔同架啦!你去開PageOne燒錢買鬼佬書嘅,唔通有一日會殺入大眾咩!中三商係就係一樣都係中資,但係睇下佢地關聯出版 部門啲出版物,你就知佢地三間行緊唔同line啦。商務會同小克出漫畫現流行、三聯攻香港歷史文化、中華就真係中華文化主導(btw,呢啲先叫統戰架嘛, 使鬼硬推國民教育啫)。

你要話啲香港人低品味,最少你自己都話下俾我聽你自己係裏面見到啲咩書丫。而如果評論都係感嘆聽彭浩翔同馬家輝都有深宵講座喎,提 高文化喎,咁同蘋果話撞到趙碩之有咩分別?(嘩,趙碩之都睇書喎,幾有文化!)

二、

公平啲講,我都唔多敢從呢個角度去寫:書海無涯,邊個夠膽講自己識好多。同埋個場真係好迫,迫到一個地步,又唔係真係好睇得真。(喂,我冇優先場, 記者都有卦?)不過,台灣出版人郝明義喺《越讀者》提過,書店的質素,都有好多嘢可以評估,書種齊唔齊,重要書目有冇,你鐘意嘅書佢地有冇賣,啲嘢易唔易 搵等等等等。關於呢幾樣,有幾樣嘢值得講。

首先係好多人關心嘅流行書:科幻小說嘅讀者可以慳番啲時間,因為得一個架(連埋英文),相對推理小說嗰四個,推理小說迷先勝一仗(宮部美幸全部都 齊,其他的也不用說了);不過,輕小說的讀者們才是最大得益者,真係好多,不過散晒係八樓同九樓。至於其他流行小說,sorry,參觀當日,收銀機條人龍 長到遮著個架,行都行唔到埋去,莫講話睇。

當然,我個人行得最耐嘅係人文社會部份。歷史部份除了PageOne和商務都會做到的編年和地域分類之外,還有一小櫃的文化史,配合這幾年多出版的 博物歷史小書,吃的歷史呀,從一百件物件看世界之類。看到了一本講魔法書歷史,買左。社會學同政治同哲學都好多架,但都有同樣的怪事:總有幾個架你找到不 它隨甚麼方法分類,尤以社會學(近窗英文書列)為甚。

三、
但最有趣嘅莫過於所謂self help或者大眾心理學嘅位置。一般書店都將之放在明顯的地方,但誠品將佢放响以上幾個號稱悶爆嘅書種中間。結果啲人要去睇,就要經過埋呢批書。有個好處 係,至少見到啲人都會停下喺外面推介書度望下,先至入去啲易入口嘅書度。呢樣嘢可以作為例子講兩樣嘢。

個例子想講嘅第一樣係:書其實都係嗰啲,點樣先可以sell得有型?入到台灣嘅誠品,你會expect有啲好嘢係香港買唔到,所以你先會覺得行入去 有意思。我真心唔怪啲記者睇唔出「大型外資書店」有咩分別,因為佢地事實上喺好唔爭氣地入埋啲幾乎冇分別嘅中.文.書。係,係中文書。

你班大舖,都係賣台版書多架啦!點解 台灣硬係多啲選擇?於是番番嚟個問題其實係:書店出左咩事?佢地可以推去出版社度話佢地唔出,又可以話啲讀者唔鐘意:喂, 咁我地真係好恨搭飛機然後托啲書番嚟咩?唔好呃自己,尤其是三中商,有幾多本土出版俾佢自我審查左?或者覺得唔好賣連擺嘅機會都冇?

我永世都唔點解佢地嘅英文部門可以做到有分別(PageOne選書闊但淺,商務分類少但算多啲,Swindon…退步囉…)但係中文書就間間都一 樣。唔通買英文書嘅讀者真係上流啲?梗係唔係!分別係英文書入得大膽啲,同埋啲擺位真係有諗過,想辦法令讀者接觸多啲唔同範疇嘅嘢,製造意外,等佢地可以 發現多啲自己冇諗過會睇嘅嘢。誠品咁多年成為香港人景點,真係得廿四小時咩?

第二、冇self help呢啲流行嘢幫手,人文類個書架係的確少啲人行,但係唔覺意碰到,就會越睇越闊。事實上,用呢個道理去諗,其實市場個分眾都好清楚,大路人去大路 店,睇到有咁上下水平嘅,就未會滿足於嗰幾檔大路嘢。書就有呢樣好,有reference,睇到上癮就識看圖索驥,得魚忘荃,越睇越遠。有大路店做入門 嘢,先有人去睇例如序言啲書。係,誠品的確係扮型,但你要真型都要經歷過入門級卦。

我咁講係因為行左誠品呢一敞,書係好多,但係睇真啲,佢地啲嘢硬係覺得似大學書店:即係一大堆學術主流textbook(哲學主題分類架特別厲 害)。係地租係貴,二樓書店老闆揀書揀得手緊,所以識貨嘅人上到序言之類嘅二樓書店咪更覺得好嘢囉。文化事業同其他嘢應該唔同,因為始終都係一種癖好,上 左癮就對一般嘅貨色睇唔上眼,而且二樓書店做出嚟嘅另外一種型, 同誠品始終兩件事。即係HMV始終唔會食左韻彙,HMV同韻彙都有同樣的敵人:就係唱片作為一種媒體嘅問題。又或者,IKEA嚟左,搞多左關於室內設計嘅 推廣,結果都冇整死幾條家具街,大家關心左室內設計,呢啲本地薹反而越做越大。上面提到第三類嘅評論,即文化霸權食二樓書店論,我一啲都唔同意。

四、

作為一個讀者,誠品係唔係一個圖騰唔關我事,我只關心,我發現新書種的機會多唔多,只要佢地嘅選書作風唔會跟番班本地大書店,我又真係冇咩所謂。係 呀,如果你相信香港人唔鐘意睇書,行出街嗱本書都有人話扮嘢嘅話,然後你又話行誠品嘅人都只係扮嘢,或者誠品本身都係一個扮嘢嘅地方:呢句話都夠晒扮嘢。

廣告

標籤:

About Johncoal

莊炭頭,黑口黑面,體形龐大,在新區舊區中學任教新新學科。努力學習發聲,並以指導學生找出自己的聲線為業。

3 responses to “睇書人睇誠品”

  1. Kursk says :

    我係第四種,見到咁多人就覺得討厭,覺得香港人都係唔迫過唔舒服。最後會搵個少D人既時間去既。

  2. galileo_c says :

    去台灣都唔會去誠品的經過。

  3. Regina says :

    喜愛台灣誠品,除了書種多,還有他的display方式,有很多書可在香港買或訂甚至上amazon taobao買,但沒被"看到"你根本不知道!相比某本地連鎖書店的口號,誠品才真正做到"為書找讀者為讀者找書"!去台灣誠品除了買一些香港貴不到的書外還有一個任務:抄書名!再回香港買!香港大型書店的弱點是不能引導讀者開拓眼界,書不是沒有只是讀者看不到!書只是被分類而非被介紹(這裏說的介紹並非專櫃推介,是好像時裝店的visual merchandising,例如一個人很喜歡偵探小說,不用故意在偵探專櫃努力搜尋已可發現未知道但很苻合自己口味或可以一看的新作品/作者!誠品懂得這門藝術,是他的可貴之處。

發表迴響

在下方填入你的資料或按右方圖示以社群網站登入:

WordPress.com Logo

您的留言將使用 WordPress.com 帳號。 登出 / 變更 )

Twitter picture

您的留言將使用 Twitter 帳號。 登出 / 變更 )

Facebook照片

您的留言將使用 Facebook 帳號。 登出 / 變更 )

Google+ photo

您的留言將使用 Google+ 帳號。 登出 / 變更 )

連結到 %s

%d 位部落客按了讚: